‘Eten digitala’ kontzeptua zenbait gizarte taldek teknologia berriak eskuratzeko dituzten desberdintasunak adierazteko erabiltzen da: txirotutako eta aberastutako herrietako pertsonak; hiri eta landa testuinguruetakoak, etab. Hortaz, emakumeek (orokorrean, eta espainiar Estatuari dagokionez ere bai) Internetera gizonezkoak baino gutxiago eta maiztasun txikiagoz konektatzen jarraitzeko eta erabilera aurreratuetan hain alfabetatuta ez egoteko arrazoiak aztertzen ditu generoko eten digitalak.
Gehiago irakurri
Gusi Bertomeu E-mujeres-eko zuzendariak zenbait arrazoi adierazi ditu hori gertatzeko, hala nola lan merkatuan emakume gutxiago sartzea, hain informatizatuta ez dauden inguruneetan lan egitea, interneterako konexioa izan ahal izateko denbora eta diru gutxiago edukitzea, sareari erabilgarritasun txikiagoa ikustea, eta gizonen artean teknologia zaletasuna gehiago sustatzea. Emakume askok –eransten dut nik‑ aisiari eta olgetari lotuta ikusten dute internet, eta maiz ez dute gizonek beste defendatzen horretarako eskubidea; hori dela eta, sarean nabigatzeari baino garrantzitsuagoak deritzeten jarduerak lehenesten dituzte.
Sare sozialei dagokienez, mundu osoko Facebook eta Twitterreko profilen %57 emakumeenak dira, baina espainiar Estatuan gizonezkoak dira gehiengoa. Edonola ere, emakumeak gutxitan agertzen dira Twiterreko itzal handieneko kontuen, ospetsuenen edo jarraitzaile gehien dutenen rankinetan. Adibidez, Twitterreko itzal handieneko 50 kazetarien zerrendan, 13 emakume baino ez daude (Ana Pastor nabarmentzen da bigarren tokian, Pedro J. Ramírezek baino gainditzen ez duela). Beraz, esan daiteke kristalezko sabai batek oztopatu egiten duela sare sozialetan emakumeak erreferente eta iritzi aitzindaritzat hartuak izatea.
Kristalezko sabai horretan zenbait elementuk eragiten dute; besteak beste, Twiterreko arlorik ospetsuenetan, hala nola politikan, kirolean, teknologian edo umorean, gizonek toki eta protagonismo handiagoa izateak, eta emakumeek (oro har) sare sozialak eskatzen dituen maiztasunez eta bizkortasunez jarduteko denbora urriagoa izateak. Baina, nire ustez, gizarte sareak sustapen pertsonal eta profesionalerako tresna gisa gutxiago baliatzeari ere egotz dakioke kristalezko sabai hori. Norberari buruzko laudorioak egitea autoestimuari, jabekuntzari eta ospe nahiari lotuta dago (beste eztabaida bat litzateke gizonezkoen estiloari imitagarria deritzogun, edo zein den jabekuntzaren eta egolatriaren arteko muga); komunitate digitalean emakume publikoek pairatzen dituzten eraso matxistek alderdi horiek hondatzen dituzte, abagune hori ere ez dagoelako gizonezkoak gehiago txalotzeko, errespetatzeko eta miresteko joeratik salbu.
Igo